Газар зохион байгуулалт, геодези, зураг зүйн ерөнхий газрын дарга А.Энхманлай өнөөдөр Бүгд Найрамдах Солонгос Улсын Орон зайн мэдээллийн салбарыг дэмжих агентлаг (SpaceN) болон Орон зайн мэдээллийн чанарын менежментийн алба (SIQMS)-ны төлөөлөгчдийг хүлээн авч уулзлаа.

Уулзалтын үеэр гурван байгууллага хамтын ажиллагаагаа өргөжүүлж, Монгол Улсад орон зайн мэдээллийн салбарыг хөгжүүлэх, технологийг сайжруулах чиглэлээр мэдлэг, туршлага солилцох төслийг 2027-2031 оны хооронд 4 жилийн хугацаатай зохион байгуулж, хэрэгжүүлэх талаар санал солилцон, харилцан ойлголцлын санамж бичигт гарын үсэг зурлаа.

Энэхүү Санамж бичгийн хүрээнд талууд дараах чиглэлээр хамтран ажиллахаар тохиролцов. Үүнд:

❖ Орон зайн мэдээллийн чиглэлээр туршлага, мэдлэг, технологи солилцох;

❖ Орон зайн мэдээллийн чанарын хяналт, удирдлагыг сайжруулах;

❖ Хоёр улсын хамтарсан судалгаа, төсөл хэрэгжүүлэх;

❖ Боловсон хүчнийг чадавхжуулах сургалт зохион байгуулах;

Энэхүү хамтын ажиллагаа нь Монгол Улсад орон зайн мэдээллийн салбарын хөгжил, технологийн шинэчлэлт хийхэд түлхэц өгч, хоёр улсын найрсаг харилцаа, хамтын ажиллагааг бэхжүүлэх чухал алхам боллоо.