НЭГДСЭН ҮНДЭСТНИЙ БАЙГУУЛЛАГЫН ДЭЛХИЙН ОРОН ЗАЙН МЭДЭЭЛЛИЙН АНХДУГААР КОНГРЕСС АМЖИЛТТАЙ ЗОХИОН БАЙГУУЛАГДАЖ ӨНДӨРЛӨЛӨӨ

2018-12-05

 

Газар зохион байгуулалт, геодези, зураг зүйн газрын дарга Ц.Ганхүү тэргүүтэй төлөөлөл Бүгд Найрамдах Хятад Ард Улсын Дэчин хотноо байрлах “Зежанийн Орон зайн мэдээлэлийн аж үйлдвэрийн парк” (Zhejiang Geospatial Information Industrial Park)-т 2018 оны 11 дүгээр сарын 19-21-ний өдрүүдэд зохион байгуулагдсан Нэгдсэн Үндэстний Байгууллагын Дэлхийн Орон Зайн Мэдээллийн Анхдугаар Конгресст оролцлоо. 

“Дэлхий ертөнцийн сайн сайхны төлөөх орон зайн арга зам (The Geospatial Way to a Better World)” сэдвийн дор зохион байгуулагдсан уг арга хэмжээг НҮБ-ын Статистикийн алба, НҮБ-ын Дэлхийн Орон Зайн Мэдээллийн Менежментийн Зөвлөхүүдийн Хорооны Нарийн бичгийн албыг хариуцагчийн хувиар БНХАУ-ын Засгийн газар (Байгалийн нөөцийн яам, Зежань мужийн Захиргаа)-тай хамтран анх удаа зохион байгуулсан бөгөөд 83 орны 1200 гаруй төлөөлөгчид оролцсон өргөн хүрээний өндөр ач холбогдол бүхий арга хэмжээ болж өнгөрлөө.

UNWGIC-ийн зорилго нь НҮБ-ын гишүүн орнуудын дунд хамтын ажиллагааг улам өргөжүүлэх, орон зайн мэдээллийн менежментийн технологийн хөгжлийг дэмжих, харилцаа холбоо, ойлголт, мэдлэг, хэрэглээг нэмэгдүүлэх, орон нутаг, бүс нутаг, дэлхийн хэмжээнд тулгамдаж буй асуудлуудыг шийдвэрлэхэд орон зайн мэдээллийн технологи, инновацын гүйцэтгэх үүрэг, бодлогын орчин зэрэг өргөн хүрээний асуудлуудыг хэлэлцэх таатай орчныг бүрдүүлэхэд оршсон юм.

Конгрессын үеэр болсон онцлох үйл явдлаас товч дурдвал:

  • UNWGIC-т оролцогчид Моганьшань Тунхаглал (Moganshan Declaration)-ыг хамтран баталлаа.
  • НҮБ-ын Залуу Орон зайн Мэргэжилтнүүдийн Уулзалт (Young Geospatial Prefessional Summit) анх удаа зохион байгуулагдаж орон зайн мэдээлэл технологийн чиглэлээр ажиллаж буй ирээдүйн залгамж халаа болсон залуу боловсон хүчнүүд өөрсдийн санал бодол, хийж хэрэгжүүлж буй төсөл, туршлагаа хуваалцсан юм.
  • Уг уулзалтад тус газрын Орон зайн мэдээлэл, технологийн хэлтсийн дарга Э.Баярмаа өөрийн улсад авч хэрэгжүүлж буй арга хэмжээ, туршлагаас хуваалцан оролцов.
  • ГЗБГЗЗГ нь БНХАУ-ын Байгалийн нөөцийн яамны харьяа Хиймэл дагуулын тандан судалгааны хэрэглээний төвтэй хиймэл дагуулын мэдээ хүлээн авах чиглэлээр Харилцан ойлголцлын санамж бичигт үзэглэв. Хамтын ажиллагааны хүрээнд ZY3 01, 02 хиймэл дагуулын зургийг 5 жилийн хугацаатай манай улсад нийлүүлэх юм.
  •  НҮБ-ын Дэлхийн орон зайн мэдээллийн менежментийн Ази, номхон далайн бүсийн Зөвлөхүүдийн хорооны ээлжит хурал 11 дүгээр сарын 22-нд зохион байгуулагдаж дараагийн гурван жилийн гүйцэтгэх зөвлөлийн бүрэлдэхүүнээ шинээр зохион байгуулж ажлын төлөвлөгөөгөө баталлаа. 

Ази, номхон далайн бүсийн зөвлөхүүдийн хорооны шинэ бүтэц бүрэлдэхүүнд Австрали улс Ерөнхийлөгчөөр, Монгол, Япон, БНХАУ Дэд ерөнхийлөгчөөр сонгогдож гүйцэтгэх зөвлөлийг тэргүүлэхээр болов. Харин зөвлөхүүдийн хорооны Нарийн бичгийн албыг UN-ESCAP цаашид хариуцахаар болсон нь энэ удаагийн хурлын онцлох шийдвэр байлаа.

 

Санал асуулга

Байгууллагын цахим хуудасны бүтэц загвар таньд таалагдаж байна уу?

© 2018 ОН. ГАЗАР ЗОХИОН БАЙГУУЛАЛТ, ГЕОДЕЗИ, ЗУРАГ ЗҮЙН ГАЗАР