Даргын мэндчилгээ

       Газрын харилцааны салбарыг хөгжүүлэх үйлсэд хамтран зүтгэж буй нийт ажилтан, албан  хаагч, мэргэжилтэн, эрдэмтэн, судлаачид болон аж ахуйн нэгж, байгууллага, иргэд, олон нийт та бүхэнд “Газрын харилцааны ажилтны өдөр”-ийн баярын болон Монгол Улсын иргэнд газар өмчлүүлж эхэлсний 15 жилийн ойн мэндийг байгууллагынхаа хамт олны өмнөөс болон хувиасаа хүргэж  байна.

       Монгол Улсын иргэд зах зээлийн нийгмийн жам ёсны дагуу сайн дурын үндсэн дээр өөрийн гэр  бүлийн хэрэгцээнд өмчийн газартай байх, түүний үр шимийг хүртэх түүхэн үйл явдлыг эхлүүлсэн “Монгол улсын иргэнд газар өмчлүүлэх тухай” хуулийг 2002 онд  Улсын Их Хурлаар батлан, 2003 оны 5 дугаар сарын 1-ний өдрөөс мөрдөж эхэлсэн билээ.

      Улс орны хөгжил дэвшил, нийгмийн шинэ харилцааны өөрчлөлт, шаардлагатай уялдуулан 2008 онд Улсын Их  Хурлаас тус хуульд Монгол Улсын иргэн бүрт гэр бүлийн хэрэгцээний зориулалтаар газрыг нэг удаа үнэ төлбөргүйгээр хуульд заасан хэмжээгээр өмчлүүлэхээр нэмэлт өөрчлөлтийг оруулж батласнаар “газар” хэмээх өмч хөрөнгийг захиран зарцуулах, эдийн засгийн эргэлтэнд оруулах эрх зүйн таатай орчинг бий болгосон бөгөөд  2017 оны жилийн эцсийн байдлаар Монгол улсын хэмжээнд 570771 иргэн 57767,26 га  газрыг  өмчилж аваад байна.

    Ийнхүү газраа өмчилж авсан иргэдийн тоо жил бүр өсөн нэмэгдэж, 316321 иргэн улсын бүртгэлд газар өмчлөх эрхээ баталгаажуулснаас худалдсан 63559, бэлэглэсэн 80514, барьцаалсан 220904, түрээсэлсэн 70 иргэн байгаа нь өмчлөлийн газар эдийн засгийн эргэлтэнд орж үр шимээ өгч байгааг илтгэнэ. 

     Монгол Улсын Засгийн газрын 2016-2020 оны үйл ажиллагааны хөтөлбөрийг хэрэгжүүлэх арга хэмжээний хүрээнд гэр бүлийн хэрэгцээний зориулалтаар Монгол Улсын иргэнд газрыг нэг удаа үнэгүй өмчлүүлэх хугацааг 10 жилээр буюу 2028 он хүртэл сунгахаар “Монгол Улсын иргэнд газар өмчлүүлэх тухай хуульд нэмэлт, өөрчлөлт оруулах тухай  хууль”-ийн төслийг боловсруулж Засгийн газрын хуралдаанаар хэлэлцүүлэн, Улсын Их Хуралд өргөн барьж батлууллаа.

      Монгол улсын газрын харилцааны салбарын үйл ажиллагааг таниулах, үр дүн, ач холбогдолыг олон нийтэд хүргэх зорилгын үүднээс 2004 оноос эхлэн жил бүрийн тавдугаар сарын эхний долоо хоногт “Газрын харилцааны ажилтны өдөр” -ийг улсын хэмжээнд тэмдэглэн өнгөрүүлж ирсэн уламжлалтай.

     Энэ жилийн хувьд уг өдрийг угтан нэгдүгээр сараас тавдугаар сарын хооронд “Газрын нэгдсэн бодлого, нэгдмэл тогтолцоо” эрдэм шинжилгээний бага хурал, эрдэмтэн, судлаачдын дундах шилдэг судалгааны ажлын болон  их, дээд сургуулийн оюутнуудын шилдэг илтгэлийн уралдаан, Газрын харилцааны салбарын шилдгүүдийг шалгаруулах үйл ажиллагаа, “Шилжин явах цом”-ын төлөөх спортын арга хэмжээг тус тус  зохион байгууллаа.  

     Мөн нийслэл хотод Газрын алба, 21 аймагт Газрын харилцаа, барилга, хот байгуулалтын газрууд нь “Нээлттэй хаалганы өдөр”-ийг зохион байгуулж, салбарын болон өөрсдийн үйл ажиллагааны талаарх мэдээлэл, таниулгыг олон нийтэд хүргэн, иргэдийн санал, хүсэлтийг хүлээн авч шийдвэрлэж байна.   

     Газрын харилцааны салбарт олж буй ололт, амжилтаа жилээс жилд улам бататган, салбарын өмнө тавигдаж буй шинэ зорилго, зорилтыг үр дүнтэй хэрэгжүүлэхэд Та бүхэнтэй бид хамтран ажиллах болно. 

Та бүхэндээ 2018 онд  амжилт бүтээл, аз хиймориор дүүрэн байхыг хүсэн ерөөе.

 

ГАЗАР ЗОХИОН БАЙГУУЛАЛТ,
ГЕОДЕЗИ, ЗУРАГ ЗҮЙН  ГАЗРЫН ДАРГА
Ц.ГАНХҮҮ
Санал асуулга

Байгууллагын цахим хуудасны бүтэц загвар таньд таалагдаж байна уу?

© 2017 ОН. ГАЗАР ЗОХИОН БАЙГУУЛАЛТ, ГЕОДЕЗИ, ЗУРАГ ЗҮЙН ГАЗАР